काठमाडौं, असोज २
संविधान दिवसको अवसरमा माओवादी केन्द्रका अध्यक्ष तथा नेपालका पूर्व प्रधानमन्त्री पुष्पकमल दाहाल ‘प्रचण्ड’ले आज आफ्नो आधिकारिक फेसबुक पेजमार्फत एक भिडियो सन्देश जारी गर्दै हालैको जेन्जी आन्दोलन, देशमा भएको विध्वंस, र पुनःनिर्माणको आवश्यकता बारेमा धारणा राखेका छन्।
भदौ २३ गतेको नरसंहार र २४ गतेको देशव्यापी तोडफोडले सार्वजनिक सेवा प्रभावित भएको उल्लेख गर्दै उनले अब धुलो हेरेर रमिता हेर्ने समय नभएको स्पष्ट पारे। उनले सम्पूर्ण राजनीतिक दल र जनतालाई पुनःनिर्माणमा जुट्न आह्वान गरे।
२०६२/६३ को जनआन्दोलनको सन्दर्भ उठाउँदै प्रचण्डले जेन्जी आन्दोलनलाई सकारात्मक रूपमा लिँदै माओवादी आन्दोलनसँग अत्यधिक समानता रहेको बताए। “त्यो बेला बहुमत संसदमा जुटाउन नसक्दा प्रत्यक्ष कार्यकारी प्रमुख ल्याउन सकिएन,” उनले स्मरण गरे।
उनका अनुसार जेन्जी आन्दोलन लोकतन्त्र विरोधी नभई उन्नत लोकतन्त्र प्राप्तिको अभियान हो। तर २४ गते देशभर ऐतिहासिक संरचनाहरूको तोडफोड, लुटपाट र हिंसात्मक गतिविधिहरू आन्दोलनको मूल स्वरूप नभई प्रतिगामी तत्वहरूको प्रवेशका कारण भएको हो। ती तत्वहरूलाई कानुनी दायरामा ल्याइनेमा आफू आशावादी रहेको उनले बताए।
भिडियो सन्देशमा प्रचण्डले घोषित मितिमा निर्वाचन सम्पन्न होस् भन्ने चाहना पनि व्यक्त गरे। साथै, उनले घुमाऊरो पारामा राजावदीहरुलाई पनि गणतन्त्र विरोधी कार्य गरेको आरोप लगाएका छन उनि भन्छन “इतिहासको चिहानमा मिल्काइएकाहरुले युवाहरूको परिवर्तनको चाहनालाई उपयोग गरेर जनताको उपलब्धिहरू उल्ट्याउने प्रयास गरिरहेका छन”।
जेन्जी आन्दोलनको क्रममा ७० भन्दा बढी युवाहरूले ज्यान गुमाएको स्मरण गर्दै उनले शोक व्यक्त गरे। आन्दोलनको मागहरू बेवास्ता गर्दा उत्पन्न भएको परिणामको रूपमा अहिलेको अवस्था आएको उल्लेख गर्दै उनले यसलाई १९ दिने जनआन्दोलनको निरन्तरताको रूपमा व्याख्या गरे। उनका अनुसार भ्रष्टाचारको अन्त्य, प्रत्यक्ष कार्यकारी प्रमुखको व्यवस्था, र जनमुखी शासन प्रणालीको माग माओवादी आन्दोलनकै अधूरा एजेण्डाहरू हुन्, जसलाई नयाँ पुस्ताले आफ्नै शैलीमा उठाइरहेका छन्।
